കൊച്ചി: മുനമ്പത്ത് നിമിഷങ്ങള്‍കൊണ്ടു തീര്‍പ്പാക്കാവുന്ന വിഷയമാണു സര്‍ക്കാര്‍ ജനങ്ങളെ ഭിന്നിപ്പിക്കാനുള്ള അവസരമൊരുക്കിക്കൊടുക്കുന്നതെന്ന് ഡിസിസി പ്രസിഡന്‍റ് മുഹമ്മദ് ഷിയാസ്. സംഘപരിവാര്‍ രാഷ്‌ട്രീയത്തിന് അവസരം സര്‍ക്കാര്‍ ഒരുക്കിക്കൊടുക്കുകയാണ്.
സര്‍ക്കാര്‍ ഇരട്ടത്താപ്പ് അവസാനിപ്പിക്കണം. ഒരാളെയും കുടിയിറക്കാന്‍ കോണ്‍ഗ്രസ് അനുവദിക്കില്ല. സംസ്ഥാനത്തു നിലവിലുള്ള ജുഡീഷല്‍ കമ്മീഷനുകളുടെ സ്ഥിതിയെക്കുറിച്ച് ജനങ്ങള്‍ക്ക് നല്ല ബോധ്യമുണ്ട്.
ജുഡീഷല്‍ കമ്മീഷന്‍റെ പേരു പറഞ്ഞ് ജനങ്ങളെ കബളിപ്പിക്കാനാണു സര്‍ക്കാര്‍ ശ്രമിക്കുന്നതെന്ന് ഷിയാസ് ആരോപിച്ചു. സര്‍ക്കാര്‍ ഇനിയും ജനങ്ങളെ കബളിപ്പിക്കാന്‍ ശ്രമിച്ചാല്‍ ശക്തമായ പ്രതിരോധം തീര്‍ക്കാന്‍ കോണ്‍ഗ്രസ് തയാറാകുമെന്നും ഷിയാസ് മുന്നറിയിപ്പ് നല്‍കി.