ന്യൂയോർക്ക്: ഗാസയിൽ വെടിനിർത്തലാവശ്യപ്പെടുന്ന പ്രമേയം യുഎൻ രക്ഷാസമിതിയിൽ അമേരിക്ക വീറ്റോ ചെയ്തു.
ഗാസയുദ്ധം ഉപാധികളില്ലാതെ എന്നെന്നേക്കുമായി അവസാനിപ്പിക്കണമെന്നും ബന്ദികളെ ഉടൻ മോചിപ്പിക്കണമെന്നും ആവശ്യപ്പെടുന്ന പ്രമേയത്തെ രക്ഷാസമിതിയിലെ 15 അംഗങ്ങളിൽ 14 പേരും അനുകൂലിച്ചു.
ഇതു നാലാം തവണയാണ് അമേരിക്ക ഇസ്രയേലിനുവേണ്ടി ഗാസാ വിഷയത്തിൽ വീറ്റോ അധികാരം പ്രയോഗിക്കുന്നത്.
എന്നാൽ, ഹമാസിന് അപടകരമായ സന്ദേശം നല്കുന്ന പ്രമേയമാണിതെന്ന് യുഎന്നിലെ അമേരിക്കയുടെ ഡെപ്യൂട്ടി അംബാസഡർ റോബർട്ട് വുഡ് ചൂണ്ടിക്കാട്ടി. കൂടുതൽ ഭീകരതയ്ക്കു വഴിതെളിക്കുന്ന പ്രമേയമാണിതെന്ന് ഇസ്രയേൽ ആരോപിച്ചു.
അതേസമയം, അമേരിക്കൻ നടപടിയിൽ വലിയ ഖേദമുണ്ടെന്ന് ഫ്രാൻസ് പ്രതികരിച്ചു. ബന്ദിമോചനവും യുദ്ധം അവസാനിപ്പിക്കലും ഉടനടി വേണമെന്ന് ബ്രിട്ടൻ ആവശ്യപ്പെട്ടു.
