കൊച്ചി: കേരളത്തിലെ ക്രൈസ്തവ സമൂഹത്തിന്റെ വിവിധ പ്രശ്‌നങ്ങള്‍ പഠിക്കാന്‍ സംസ്ഥാന സര്‍ക്കാര്‍ നിയമിച്ച ജസ്റ്റീസ് ജെ.ബി. കോശി കമ്മീഷന്‍ പഠന റിപ്പോര്‍ട്ട് അടിയന്തരമായി വെളിച്ചത്തു കൊണ്ടു വരണമെന്ന് സിബിസിഐ ലെയ്റ്റി കൗണ്‍സില്‍ സെക്രട്ടറി ഷെവ. അഡ്വ. വി.സി. സെബാസ്റ്റ്യന്‍ ആവശ്യപ്പെട്ടു. റിപ്പോർട്ട് സമര്‍പ്പിച്ചിട്ട് 15 മാസം പിന്നിട്ടിട്ടും അതിന്റെ പൂര്‍ണരൂപം പുറത്തിറക്കാതെ ഭരണസംവിധാനങ്ങള്‍ ഒളിച്ചോടുന്നതു നിര്‍ഭാഗ്യകരമാണ്.
കേരളത്തിലെ ക്രൈസ്തവ സമൂഹം ഒറ്റക്കെട്ടായി ഉണര്‍ന്നു പ്രവര്‍ത്തിച്ചില്ലെങ്കില്‍ നിലനില്പുതന്നെ ചോദ്യം ചെയ്യുന്ന സാഹചര്യമാണുള്ളത്. ക്രൈസ്തവ സ്ഥാപനങ്ങളിലേക്കും വിശ്വാസി സമൂഹത്തിലേക്കുമുള്ള ബാഹ്യശക്തികളുടെ കയന്നു കയറ്റവും തീവ്രവാദ അജണ്ടകളും നിസാരവത്കരിക്കരുത്.
കേരള മൈഗ്രേഷന്‍ സർവേ റിപ്പോര്‍ട്ട് 2023ല്‍ പ്രതിപാദിക്കുന്ന കേരളത്തിലെ ക്രൈസ്തവ ജനസംഖ്യയിലെ ഇടിവും വിദേശ കുടിയേറ്റവും വിവിധ ക്രൈസ്തവ സഭാ വിഭാഗങ്ങൾ കൂടുതല്‍ പഠനവിഷയമാക്കുകയും മൈക്രോ മൈനോറിറ്റിക്ക് നിർവചനവുമുണ്ടാകണം.
ക്രൈസ്തവ സംഭാവനകളേറെയുള്ള പൊതുവിദ്യാഭ്യാസ മേഖലയെ ബാധിക്കുന്ന ഖാദര്‍ കമ്മിറ്റി റിപ്പോര്‍ട്ടിലെ വിദ്യാഭ്യാസ പരിഷ്‌കാര നിര്‍ദേശങ്ങളോടൊപ്പം ഉള്‍ക്കൊള്ളിച്ചിരിക്കുന്ന ന്യൂനപക്ഷ അവകാശ ധ്വംസനങ്ങളും ക്രൈസ്തവ സഭകള്‍ വിശദമായ ചര്‍ച്ചയ്ക്കു വിധേയമാക്കണം. -വി.സി. സെബാസ്റ്റ്യന്‍ പറഞ്ഞു.
