മഞ്ചേരി: വില്‍പ്പനക്കായി സൂക്ഷിച്ച 2.014 കിലോഗ്രാം കഞ്ചാവ് സഹിതം പൂക്കോട്ടുംപാടം പോലീസ് അറസ്റ്റ് ചെയ്ത യുവാവിന് മഞ്ചേരി എന്‍ഡിപിഎസ് കോടതി രണ്ടുവര്‍ഷം കഠിന തടവും 20000 രൂപ പിഴയും ശിക്ഷ വിധിച്ചു. മേലേ കാളികാവ് കൊല്ലാരന്‍ വീട്ടില്‍ മുഹമ്മദ് ഫവാസി(29)നെയാണ് ജഡ്ജ് എം.പി. ജയരാജ് ശിക്ഷിച്ചത്.
പിഴയടച്ചില്ലെങ്കില്‍ മൂന്നുമാസത്തെ അധികതടവ് അനുഭവിക്കണമെന്നും കോടതി വിധിച്ചു. 2019 ആഗസ്റ്റ് രണ്ടിനാണ് പ്രതി പിടിയിലായത്. രഹസ്യവിവരം ലഭിച്ചതിന്‍റെ അടിസ്ഥാനത്തില്‍ അമരമ്പലം മൂച്ചിക്കലില്‍ പൂക്കോട്ടുംപാടം എസ്ഐ രാജേഷ് അയോടന്‍ നടത്തിയ റെയ്ഡിലാണ് സഞ്ചിയിലാക്കി കൈവശം സൂക്ഷിച്ച കഞ്ചാവ് കണ്ടെടുത്തത്.
അറസ്റ്റിലായ പ്രതി പിന്നീട് ജാമ്യം നേടിയിരുന്നു. പെരിന്തല്‍മണ്ണ ഡിവൈഎസ്പി കെ.എ. സുരേഷ് ആരംഭിച്ച അന്വേഷണം പിന്നീട് എഎസ്പി രീഷ്മ രമേശന്‍ പൂര്‍ത്തിയാക്കി കുറ്റപത്രം സമര്‍പ്പിക്കുകയായിരുന്നു.