കൊച്ചി: വിശാഖപട്ടണം കപ്പല്‍ശാലയിലെ തന്ത്രപ്രധാന വിവരങ്ങള്‍ ചോര്‍ത്തിയ കേസുമായി ബന്ധപ്പെട്ട് ദേശീയ അന്വേഷണ ഏജന്‍സി (എന്‍ഐഎ) കൊച്ചി കപ്പല്‍ശാലയിലെ മലയാളികളായ രണ്ടു കരാര്‍ ജീവനക്കാരെ കസ്റ്റഡിയിലെടുത്തു.
കപ്പല്‍ശാലയിലെ വെല്‍ഡര്‍ കം ഫിറ്ററായ ബിഎംഎസ് പ്രവര്‍ത്തകന്‍ തിരുവനന്തപുരം അരുമാനൂര്‍ സ്വദേശി അഭിഷേക്, എറണാകുളം കടമക്കുടി സ്വദേശിയായ ട്രെയിനി ജീവനക്കാരന്‍ എന്നിവരെയാണ് എന്‍ഐഎ ഹൈദരാബാദ് യൂണിറ്റ് കസ്റ്റഡിയിലെടുത്തത്. ഇരുവരെയും ചോദ്യം ചെയ്തുവരികയാണ്.
ഇന്നലെ രാവിലെ മുതല്‍ ഉച്ചവരെ കൊച്ചി കപ്പല്‍ശാലയിലും സ്റ്റാഫ് ക്വാര്‍ട്ടേഴ്‌സിലും ഹൈദരാബാദില്‍നിന്നുള്ള എന്‍ഐഎ സംഘം പരിശോധന നടത്തിയിരുന്നു. ഇതിനുപിന്നാലെയാണ് ജീവനക്കാരെ കസ്റ്റഡിയിലെടുത്തത്. വിശാഖപട്ടണം കേസില്‍ അറസ്റ്റിലായ ഒരു ആസാം സ്വദേശിയുമായി കസ്റ്റഡിയിലുള്ളവര്‍ക്കു ബന്ധമുണ്ടെന്നാണ് എന്‍ഐഎ സംശയിക്കുന്നത്.
2021ല്‍ വിശാഖപട്ടണം കപ്പല്‍ശാലയിലെ സുപ്രധാന വിവരങ്ങള്‍ ചോര്‍ത്തിയ സംഭവത്തില്‍ ആന്ധ്രയിലെ കൗണ്ടര്‍ ഇന്‍റലിജന്‍സ് രജിസ്റ്റര്‍ ചെയ്ത് കേസ് എന്‍ഐഎ ഹൈദരാബാദ് യൂണിറ്റ് ഏറ്റെടുക്കുകയായിരുന്നു. സമൂഹമാധ്യമങ്ങളിലൂടെ പരിചയപ്പെട്ട പാക്കിസ്ഥാനി ചാരവനിതയ്ക്കു വിവരങ്ങള്‍ കൈമാറിയെന്നതായിരുന്നു കേസ്.
കേസില്‍ നാലുപേരെ അറസ്റ്റ് ചെയ്തിരുന്നു. ഈ സംഭവത്തിനു പിന്നാലെ കൊച്ചി കപ്പല്‍ശാലയിലെ ജീവനക്കാരും നിരീക്ഷണത്തിലായിരുന്നു. ഈ അന്വേഷണത്തില്‍ കപ്പല്‍ശാലയിലെ കരാര്‍തൊഴിലാളി ശ്രീനിഷ് എന്നയാളെ 2023 ഡിസംബറില്‍ പോലീസ് അറസ്റ്റ് ചെയ്തിരുന്നു.
‘എയ്ജല്‍ പായല്‍’ എന്ന ഫേസ്ബുക്ക് പേജിലേക്ക് പ്രതിരോധ കപ്പലുകളുടെ അകത്തെ ദൃശ്യങ്ങള്‍ അടക്കമുള്ള നിര്‍ണായക വിവരങ്ങള്‍ കൈമാറിയെന്ന് എന്‍ഐഎ തുടര്‍ന്നുള്ള അന്വേഷണത്തില്‍ കണ്ടെത്തിയിരുന്നു.