തിരുവനന്തപുരം: പെൻഷൻ വിതരണ തിരിച്ചടവ് ഉൾപ്പെടെയുള്ളവയ്ക്കായി കെഎസ്ആർടിസിക്ക് സംസ്ഥാന സർക്കാർ 91.53 കോടി രൂപകൂടി അനുവദിച്ചതായി ധനമന്ത്രി കെ.എൻ. ബാലഗോപാൽ അറിയിച്ചു.
ഇതിൽ 71.53 കോടി രൂപ പെൻഷൻ വിതരണത്തിന് കോർപറേഷൻ എടുത്ത വായ്പയുടെ തിരിച്ചടവിനായാണ് നൽകുന്നത്. 20 കോടി രൂപ സഹായമായും നൽകി.
പ്രാഥമിക കാർഷിക വായ്പ സംഘങ്ങളുടെ കണ്സോർഷ്യത്തിൽനിന്ന് പെൻഷൻ വിതരണത്തിനായി കെഎസ്ആർടിസി എടുത്ത വായ്പയുടെ തിരിച്ചടവാണ് സർക്കാർ ഉറപ്പാക്കുന്നത്.
ഈ മാസം രണ്ടാം തവണയാണ് പണം അനുവദിക്കുന്നത്. നേരത്തെ 30 കോടി അനുവദിച്ചിരുന്നു. ഇതോടെ സഹായം 121.53 കോടിയും രണ്ടാം പിണറായി സർക്കാർ വന്നതിനു ശേഷം 5868.53 കോടിയുമായി. ഈ മാസം നൽകിയ തുകയിൽ 50 കോടി ശമ്പളം,പെൻഷൻ എന്നിവയ്ക്കും ബാക്കി 71.53 കോടി വായ്പാ തിരിച്ചടവിനുമാണ്. പെൻഷൻ വിതരണത്തിനായി പ്രാഥമിക കാർഷിക ക്രെഡിറ്റ് സംഘങ്ങളിൽ നിന്നും എടുത്ത വായ്പയാണ് തിരിച്ചടക്കുക.
ശന്പളവും പെൻഷനുമടക്കം മുടക്കം കൂടാതെ വിതരണം ഉറപ്പാക്കാൻ മാസത്തിന്‍റെ ആദ്യം 30 കോടി രൂപ കൂടി അനുവദിച്ചിരുന്നു. ഇതിനു പുറമേയാണ് ഇപ്പോൾ 20 കോടി കൂടി നൽകിയത്. ഇതിനു വേണ്ടി മാത്രം പ്രതിമാസം 50 കോടി രൂപയെങ്കിലും കോർപറേഷന് സർക്കാർ നൽകുന്നുണ്ട്.