കൊല്ലം: ഓച്ചിറയിൽ കാറിൽ കടത്തിക്കൊണ്ട് വന്ന 61.5 ഗ്രാം എംഡിഎംഎയുമായി അഞ്ച് യുവാക്കൾ അറസ്റ്റിൽ. കൊല്ലം സ്വദേശികളായ ബിജിൻ ബിജു(25 വയസ്), മുഹമ്മദ് ഷാൻ(22 വയസ്), ആദർശ്(23 വയസ്), ഹേമന്ത് സാഗർ (21), ഹരികൃഷ്ണൻ(20) എന്നിവരാണ് പിടിയിലായത്.
എക്സൈസാണ് ഇവരെ അറസ്റ്റ് ചെയ്തത്. എംഡിഎംഎ കടത്താൻ ഉപയോഗിച്ച കാറും കസ്റ്റഡിയിൽ എടുത്തു. ബംഗളൂരുവിൽ നിന്നും വൻതോതിൽ എംഡിഎംഎ കടത്തിക്കൊണ്ടുവന്ന് കൊല്ലത്ത് വിൽപ്പന നടത്തുന്ന സംഘമാണ് പിടിയിലായത്. എക്സൈസ് സൈബർ സെല്ലിന്‍റെ സഹായത്തിലാണ് പ്രതികളെ പിടികൂടിയത്.
വാഹന പരിശോധനക്കിടെ പ്രതികളെത്തിയ വാഹനം തടഞ്ഞ് നടത്തിയ പരിശോധനയിലാണ് മയക്കുമരുന്ന് കണ്ടെത്തിയത്. രഹസ്യ വിവരത്തിന്‍റെ അടിസ്ഥാനത്തിൽ ഏറെ നാളായി ഇവർ നിരീക്ഷണത്തിലായിരുന്നുവെന്ന് എക്സൈസ് ഉദ്യോഗസ്ഥർ പറഞ്ഞു.