തിരുവനന്തപുരം: മുതലപ്പൊഴിയില്‍ വീണ്ടും മത്സ്യബന്ധന വള്ളം മറിഞ്ഞുണ്ടായ അപകടത്തിൽ ഒരാളെ കാണാതായി. അഞ്ചുതെങ്ങ് സ്വദേശി ബെനഡിക്ടിനെയാണ് കാണാതായത്. ഇയാള്‍ക്കായുള്ള തിരച്ചില്‍ തുടരുകയാണ്.
ഇന്ന് രാവിലെയാണ് സംഭവം. നാല് പേരാണ് വള്ളത്തില്‍ ഉണ്ടായിരുന്നത്. വള്ളം മറിഞ്ഞു തിരയിൽപ്പെട്ട മൂന്നുപേരെ രക്ഷപ്പെടുത്തി. കാണാതായ ആൾക്കുവേണ്ടിയുള്ള തെരച്ചിൽ വൈകുന്നേരം വരെ തുടർന്നെങ്കിലും കണ്ടെത്താനായില്ല. ഇന്നു തെരച്ചിൽ തുടരും.
മത്സ്യബന്ധനം കഴിഞ്ഞ് തിരികെ വരുന്പോഴായിരുന്നു അപകടം. ശക്തമായ തിരമാലയിൽ വള്ളം തലകീഴായി മറിയുകയായിരുന്നു. രണ്ടുപേരെ മറൈൻ എൻഫോഴ്സ്മെന്റാണു രക്ഷപ്പെടുത്തിയത്.
ഒരാളെ മറ്റൊരു വള്ളത്തിലുണ്ടായിരുന്നവർ രക്ഷപ്പെടുത്തി. അഞ്ചുതെങ്ങ് സ്വദേശികളാണ് വള്ളത്തിലുണ്ടായിരുന്നത്. അഞ്ചുതെങ്ങ് സ്വദേശി ജോബോയുടെ ‘സിന്ദുയാത്ര മാതാ’ എന്ന വള്ളമാണ് അപകടത്തിൽപ്പെട്ടത്. മുതലപ്പൊഴിയിൽ നേരത്തെയും പലതവണ വള്ളം മറിഞ്ഞ് അപകടമുണ്ടായിട്ടുണ്ട്.